تحریر: عباس مہد
کائنات کے اس عظیم کارخانے میں انسان کا سفر محض چند مقررہ سانسوں اور معین لمحات کی مہلت ہے۔ ہم اس دنیا نامی سراسر عارضی سرائے میں ایک ایسے مسافر کی مانند داخل ہوتے ہیں جسے ایک نہ ایک دن اپنا تمام تر سامان، رشتے، تعلقات، آرزوئیں اور مان یہیں چھوڑ کر اگلی منزل کی طرف روانہ ہو جانا ہے۔ مگر اس مختصر ترین مسافت کے دوران انسان کا سب سے بڑا امتحان اس کی سوچ، اس کا کردار اور اس کا رویہ بنتا ہے۔ زندگی کے کٹھن اور ناہموار راستوں پر چلتے ہوئے انسان کا سامنا طرح طرح کے نفوس اور رنگ برنگے کرداروں سے ہوتا ہے۔ یہ دنیا ایک ایسا عجیب و غریب معروض ہے جہاں ہر قدم پر گمان بدلتے ہیں، چہرے بے نقاب ہوتے ہیں اور انسان کی خام خیالیوں کا شیشہ ریزہ ریزہ ہو کر حقیقت کا رخ دکھاتا ہے۔اس سفرِ زیست میں اکثر ایسا ہوتا ہے کہ جنہیں ہم اپنے خلوصِ دل سے دوست کا مخلصانہ درجہ دیتے ہیں، وقت کی دھوپ میں ان کے چہروں سے منافقت کا نقاب اتر جاتا ہے اور وہ دشمن سے بھی زیادہ نقصان دہ ثابت ہوتے ہیں۔ اس کے برعکس، بسا اوقات جنہیں ہم غلط فہمی یا ظاہر بینی کی بنا پر اپنا مخالف یا دشمن تصور کر رہے ہوتے ہیں، وقت کا کوئی موڑ ان کی ظرف داری اور سچائی کو ظاہر کر کے انہیں ایک مخلص دوست کے روپ میں سامنے لا کھڑا کرتا ہے۔ زندگی کے ہر موڑ پر اچھے اور برے لوگوں کی ایک پوری کہکشاں موجود ہے۔ کچھ انسان ایسے دلنشین اور بااثر ہوتے ہیں کہ ان سے مل کر لگتا ہے جیسے ہم نے کائنات کا سب سے بڑا اثاثہ اور سکون پا لیا ہو؛ ان کا ساتھ روح کو بالیدگی اور دل کو اطمینان بخشتا ہے۔ لیکن دوسری جانب، کچھ لوگ ایسے زہریلے اور منافقانہ رویوں کے مالک ہوتے ہیں کہ جن کے ساتھ بتایا ہوا وقت زندگی کا سب سے بڑا پچھتاوا اور کبھی نہ بھرنے والا زخم بن جاتا ہے۔ انسان بعد میں سوچتا ہے کہ کاش اس نے اپنی عمرِ عزیز کا وہ حصہ ان بے قدروں کی نذر نہ کیا ہوتا۔مگر یہاں ایک گہرا اور فکری نقطہ سمجھنے کی ضرورت ہے: کیا ان پچھتاووں اور منافقانہ رویوں کا جواب نفرت کی صورت میں دیا جانا چاہیے؟ ہرگز نہیں۔ کلمہِ حق اور حکمت کا تقاضا یہ ہے کہ اپنے دل سے بغض، کینہ اور نفرت کا بوجھ اتار پھینکا جائے۔ نفرت دراصل ایک ایسا زہر ہے جسے انسان خود پیتا ہے اور توقع یہ رکھتا ہے کہ دوسرا شخص اس سے متاثر ہو۔ جب کوئی انسان آپ کو زندگی کے کسی مقام پر اکیلا چھوڑ دے، آپ کی قربانیوں کی ندی پار کر کے آپ سے منہ موڑ لے، یا اپنے منافقانہ انداز سے آپ کے خلوص کا تماشا بنائے، تو اس کے لیے نفرت پالنے کے بجائے صرف اپنے دل کا دروازہ خاموشی سے بند کر دیجیے۔ جو شخص جہاں آپ کا ساتھ چھوڑ رہا ہے، اسے وہیں کا احترام دیتے ہوئے اپنی زندگی کا اگلا صفائحہ پلٹ دیجیے اور ترقی و سکون کا اگلا دروازہ کھول دیجیے۔یہ دنیا ایک چھوٹی سی گزرگاہ اور ایک تنگ سا دروازہ ہے جہاں سے ہم سب کو ایک نہ ایک دن گزر کر اس کے خالق کے حضور پیش ہونا ہے۔ جب چند دن کی مہمان سانسیں ہمارے پاس باقی ہیں، تو پھر منافقت، جھوٹے تعلق اور کھوکھلے رشتوں کو سنبھالنے میں اپنی توانائیاں کیوں ضائع کی جائیں؟ کسی منافق، بے وفا یا منہ موڑنے والے شخص کو بدلنے کی لاحاصل کوشش کرنا وقت اور جذبات کا بدترین زیان ہے۔ چاہے وہ آپ کا کتنا ہی پیارا دوست ہو، محبوب ہو، یا زندگی کا کوئی دیرینہ بیلی اگر وہ آپ کے بغیر خوش ہے اور اس نے آپ سے دوری کا راستہ چن لیا ہے، تو اسے مسکرا کر جانے دیجیے۔ جانے والے کو الوداعی سلام کہیے اور سامنے سے آنے والے نئے راستوں، نئے لوگوں اور امکانات کو “بسم اللہ” کہہ کر خوش آمدید کہیے۔اس پورے عمل میں سب سے اہم اور بنیادی چیز آپ کی عزتِ نفس ہے۔ انسان کی خودداری اور عزتِ نفس وہ واحد گوہرِ نایاب ہے جس کا سودا کسی بھی رشتے، کسی بھی تعلق اور کسی بھی شخص کی خاطر نہیں کیا جا سکتا۔ کسی کے سامنے التجا کرنا، کسی کے پاؤں پکڑنا، یا کسی کو اپنی زندگی میں زبردستی روکنے کے لیے اپنی انا اور وقار کو مجروح کرنا انسانی شرافت کے منافی ہے۔ جو شخص آپ کی موجودگی کی قدر نہیں کر سکا، وہ آپ کی التجا کی قدر کبھی نہیں کرے گا۔ التجا سے ملا ہوا تعلق صرف تذلیل لاتا ہے، محبت یا احترام نہیں۔ لہٰذا، اگر کوئی آپ کے بغیر خوش ہے اور اس نے اپنی دنیا آپ کے بغیر بسا لی ہے، تو اسے اس کے حال پر خوش رہنے دیجیے۔ اس کی خوشی میں رخنہ ڈالے بغیر اور اپنی عزتِ نفس پر کمپرومائز کیے بغیر اپنے قدم آگے بڑھا دیجیے۔زندگی رکنے کا نام نہیں ہے، یہ بہتے ہوئے دریا کی مانند آگے بڑھنے کی داستان ہے۔ جو لوگ آپ کی زندگی سے نکل جاتے ہیں، وہ دراصل ایک سبق بن کر آتے ہیں تاکہ آپ کو زیادہ بیدار مغز، صابر اور خوددار انسان بنا سکیں۔ دنیا کے اس مختصر سے اسٹیج پر اپنے کردار کو اتنا شفاف اور باوقار رکھیے کہ جب بھی ماضی کا آفتاب غروب ہو، آپ کا سر فخر سے بلند ہو کہ آپ نے خلوص میں کوئی کمی نہیں کی اور نہ ہی کسی کے سامنے اپنی خودداری کا سودا کیا۔لہٰذا، نفرتوں کو سلام کیجیے، منافقت سے خود کو دور رکھیے، اپنے اندر کا زہر ختم کیجیے، اور عزتِ نفس کا علم بلند رکھتے ہوئے زندگی کے اگلے موڑ پر اپنا گرم جوشی سے استقبال کرنے والوں کے لیے بسم اللہ کا سفیر بن جائیے۔ یہی جینے کا حقیقی سلیقہ ہے اور یہی اس فانی دنیا کا سب سے بڑا سبق ہے!
