تحریر: عباس مہد
معیشت کے ایوانوں میں جب بھی عام آدمی کی جیب پر بوجھ ڈالنے والے فیصلوں کا ذکر آتا ہے، تو پیٹرولیم مصنوعات کی قیمتیں ہمیشہ سرِ فہرست رہتی ہیں۔ ہمارے ہاں یہ روایت بن چکی ہے کہ جب بھی عالمی منڈی میں تیل کے نرخ اوپر جاتے ہیں، اس کا فوری اور سارا بوجھ غریب اور متوسط طبقے کے ناتواں کندھوں پر منتقل کر دیا جاتا ہے۔ لیکن حالیہ دنوں میں حکومتِ وقت نے پیٹرولیم مصنوعات کی قیمتوں کے تعین اور درآمدی لاگت کو سنبھالنے کے لیے جو ایک نیا نظام متعارف کرایا ہے، اس نے معاشی حلقوں میں ایک نئی بحث کو جنم دے دیا ہے۔ ایک ایسا نظام جس میں بظاہر عوام کو پیٹرول کی قیمت میں اضافے سے وقتی ریلیف دینے کی کوشش کی گئی ہے، لیکن اس کی اصل قیمت مقامی ریفنریوں اور صنعتی ڈھانچے سے وصول کرنے کا بندوبست کیا گیا ہے۔آئیے، اس نئے نظام کی گہرائی میں اتر کر دیکھتے ہیں کہ یہ پالیسی اصل میں ہے کیا، اس کے معاشی اثرات کیا ہیں، اور کیا یہ طویل المدتی بنیادوں پر ایک پائیدار حل ثابت ہو سکتی ہے یا یہ صرف آنے والے دنوں کے کسی بڑے بحران کا پیش خیمہ ہے۔
اس نئے حکومتی نظام کا پس منظر یہ ہے کہ حالیہ دنوں میں پیٹرول کے درآمدی اخراجات اور مال برداری کے نرخوں میں نمایاں اضافہ ریکارڈ کیا گیا، جو کہ فی بیرل 19.88 ڈالر سے بڑھ کر 25.52 ڈالر تک جا پہنچا۔ روایتی اور پرانے فارمولے کے تحت اگر اس بڑھتی ہوئی درآمدی لاگت کو براہِ راست صارفین پر ڈالا جاتا تو عوام کو فی لیٹر پیٹرول کی قیمت میں کم و بیش 15 روپے تک کے خوفناک اضافے کا سامنا کرنا پڑتا۔ مہنگائی کی چکی میں پہلے ہی پسے ہوئے عوام کے لیے یہ ایک ایسا ستمگر جھٹکا ہوتا جو روزمرہ کی زندگی کو مفلوج کر کے رکھ دیتا۔ اس عوامی ردعمل اور دباؤ سے بچنے کے لیے حکومت نے ایک نیا ایڈجسٹمنٹ میکانزم نکالا، جس کے تحت پیٹرولیم لیوی کے مجموعی ڈھانچے کو تبدیل کیا گیا اور درآمدی قیمتوں کے بوجھ کا ایک بڑا حصہ صارفین سے ہٹا کر براہِ راست مقامی آئل ریفنریوں کے سر پر منتقل کر دیا گیا۔اس نئے نظام کی تکنیکی حقیقت کو اگر سمجھا جائے تو یہ بات واضح ہوتی ہے کہ کاغذوں میں تو پیٹرول پر پیٹرولیم لیوی کی مجموعی حد کو برقرار رکھا گیا ہے، لیکن حکومت نے اس کی وصولی کو دو حصوں میں تقسیم کر دیا ہے۔ درآمدی لاگت میں اضافے کی وجہ سے پیدا ہونے والے فرق کو عام صارف تک پہنچانے کے بجائے مقامی ریفنریوں کے مالیاتی کھاتے سے ایڈجسٹ کرنے کا حکم دیا گیا ہے۔ چونکہ مقامی ریفائریز پاکستان کی پیٹرولیم ضروریات کا تقریباً تیس فیصد حصہ پورا کرتی ہیں، اس لیے اس بوجھ کا بظاہر یہ نتیجہ نکلا کہ پیٹرول کی فی لیٹر قیمت میں فوری اضافے کو ٹال دیا گیا اور نرخوں کو وقتی طور پر مستحکم رکھا گیا۔ حکومت نے اس چال کے ذریعے پیٹرول کی قیمت کو عوام کی فوری تنقید سے تو بچا لیا، لیکن اس کے پیچھے پلنے والا معاشی بوجھ اب ریفنریوں کے لیے ایک بہت بڑا سر درد بن چکا ہے، جنہیں ماہانہ اربوں روپے کے اضافی مالی دباؤ کا سامنا کرنا پڑ سکتا ہے۔یہاں یہ سوال اٹھنا انتہائی لازمی ہے کہ کیا یہ نیا نظام معیشت کے وسیع تر مفاد میں ہے یا یہ محض ایک وقتی سیاسی پٹی ہے جو زخم کو ڈھانپ تو سکتی ہے مگر اسے مندمل نہیں کر سکتی؟ ماہرینِ معیشت اس بات پر متفق ہیں کہ جب آپ ریاست کے ایک ستون کو بچانے کے لیے دوسرے لازمی ستون یعنی پیداواری اور صنعتی شعبے کی جڑیں ہلانا شروع کر دیں، تو اس کے نتائج اچھے برآمد نہیں ہوتے۔ مقامی ریفائریز جو پہلے ہی پرانے انفراسٹرکچر، سرمائے کی قلت اور حکومتی واجبات کے گرداب میں پھنسی ہوئی ہیں، ان پر اس طرح کا جبری مالی بوجھ ڈالنا مستقبل میں ان کی پیداواری صلاحیت کو شدید متاثر کر سکتا ہے۔ اگر ریفائریز اس اضافی بوجھ کے تلے بیٹھ گئیں، تو اس کا براہِ راست اثر ملک کی توانائی کی سیکیورٹی اور سپلائی چین پر پڑے گا، جو کہ پیٹرول کی قیمتوں میں کسی بھی وقتی ریلیف سے کہیں زیادہ خطرناک ثابت ہو سکتا ہے۔سیاسی اور معاشی نقطہ نظر سے دیکھا جائے تو حکومتی سطح پر یہ قدم بظاہر عوام کو یہ باور کرانے کے لیے اٹھایا گیا ہے کہ وہ مہنگائی کے طوفان کے آگے ایک ڈھال بن کر کھڑے ہیں۔ لیکن ایک باشعور تجزیہ کار ہونے کے ناطے یہ دیکھنا ضروری ہے کہ مصنوعی طریقوں سے قیمتوں کو روکنا اور مارکیٹ کے حقیقی اصولوں کے ساتھ کھلواڑ کرنا کبھی بھی طویل مدتی پالیسی نہیں ہو سکتی۔ جب تک ملکی معیشت میں ساختی اصلاحات، توانائی کے متبادل ذرائع اور درآمدی انحصار کو کم کرنے کے حقیقی اقدامات نہیں کیے جائیں گے، اس طرح کے جادوئی فارمولے صرف چند ہفتوں یا مہینوں کا کھیل ثابت ہوں گے۔ عوام کو وقتی سکھ دینے کے لیے صنعتی پیداوار کی کمر توڑنا ایک ایسا معاشی خبط ہے جس کی بھاری قیمت آنے والے وقتوں میں پورے ملک کو چکانی پڑتی ہے۔حاصلِ کلام اور اس عمیق تجزیے کا نچوڑ یہی ہے کہ حکومت کی طرف سے پیٹرولیم مصنوعات کی قیمتوں میں اضافے کے بوجھ کو صارفین سے ہٹا کر ریفنریوں پر منتقل کرنے کا یہ نیا نظام ایک عارضی مرہم سے زیادہ کچھ نہیں۔ یہ نظام وقتی طور پر عوام کو مہنگائی کے جھٹکے سے تو بچاتا ہے، مگر یہ معیشت کی جڑوں میں دیمک کی طرح رس رہا ہے۔ ریاست کو چاہیے کہ وہ اس قسم کے عارضی اور دباؤ والے ہتھکنڈوں کی بجائے پیٹرولیم سیکٹر میں ٹیکسوں کے انبار کو کم کرے، گورننس کو بہتر بنائے اور مارکیٹ کو اس کے فطری اصولوں پر چلنے دے۔ صرف اسی صورت میں ہی اس ملک کا معاشی پہیہ سچے اور پائیدار معنوں میں رواں دواں ہو سکتا ہے ۔آمین ثم آمین!
