چتال کا بیٹا، کولپور کا شہید — وردی نے اپنا وعدہ خون سے پورا کیا

0

تحریر: نادیہ علی بلوچ

تاریخ میں کچھ نام ایسے ہوتے ہیں جو صرف خبروں میں نہیں رہتے، وہ قوم کے ضمیر کا حصہ بن جاتے ہیں۔ میجر عمر ناصر منہاس شہید انہی ناموں میں سے ایک ہیں۔ چکوال کے گاؤں چتال سے تعلق رکھنے والے 33 سالہ اس نوجوان افسر نے وطن کے لیے اپنی جان کا نذرانہ پیش کر کے یہ ثابت کر دیا کہ اس مٹی کے بیٹے آج بھی اسی جذبے کے ساتھ کھڑے ہیں جس جذبے کے ساتھ پاکستان بنا تھا۔

میجر عمر ناصر منہاس کا تعلق 131 لانگ کورس اور 44 فرنٹیئر فورس سے تھا۔ انہوں نے پاکستان ملٹری اکیڈمی کاکول میں 152 لانگ کورس کے پلاٹون کمانڈر کے طور پر خدمات انجام دیں، جہاں انہوں نے نوجوان کیڈٹس کی تربیت کی۔ ایک اچھا افسر وہی ہوتا ہے جو حکم دینے سے پہلے خود میدان میں کھڑا ہو، اور میجر عمر ناصر منہاس کی پوری پیشہ ورانہ زندگی اسی اصول کی عملی تصویر تھی۔

13 اور 14 نومبر کی درمیانی شب بلوچستان کے کولپور اور کردگاپ کے علاقے میں سیکیورٹی فورسز انٹیلی جنس بیسڈ آپریشنز میں مصروف تھیں۔ اس آپریشن میں آٹھ دہشت گردوں کو ہلاک کیا گیا، جن میں ایک خودکش بمبار بھی شامل تھا۔ اسی دوران دشمن نے گشت پر مامور فوجی گاڑیوں کو مسلح کواڈ کاپٹرز سے نشانہ بنایا۔ اس حملے میں میجر عمر ناصر منہاس اور حوالدار محمد عدنان خان نے جامِ شہادت نوش کیا۔

یہ جدید جنگ کی ایک نئی شکل ہے، جہاں دشمن سامنے آ کر نہیں لڑتا بلکہ ٹیکنالوجی کے پیچھے چھپ کر وار کرتا ہے۔ لیکن میجر عمر ناصر منہاس پیچھے نہیں ہٹے۔ انہوں نے اپنے جوانوں کے ساتھ کھڑے ہو کر اپنے مشن کو مکمل کیا۔ ایک سپاہی مرتا نہیں، وہ شہید ہوتا ہے۔ قرآن کہتا ہے، اللہ کی راہ میں مارے جانے والوں کو مردہ مت کہو، وہ زندہ ہیں۔

میجر عمر ناصر منہاس کا گھرانہ ہی ایک فوجی گھرانہ ہے۔ ان کے والد کرنل (ر) ناصر منہاس نے خود پاک فوج میں خدمات انجام دیں۔ ان کے دو بھائی میجر حسن ناصر منہاس اور میجر علی ناصر منہاس آج بھی افواجِ پاکستان میں وطن کی خدمت کر رہے ہیں۔ یہ وہ گھر ہے جس نے ایک نہیں، تین بیٹے وطن کے سپرد کیے۔

شہید کی فیملی ہی اصل ہیرو ہوتی ہے۔ آج اس گھر میں غم بھی ہے اور فخر بھی۔ ماں کا بیٹا ضائع نہیں ہوا، وہ شہید ہوا ہے۔ باپ کا بیٹا بھاگ کر نہیں گیا، وہ دشمن کے سامنے ڈٹ کر گیا ہے۔ میجر عمر ناصر منہاس نے اپنے پیچھے اپنے والد، اپنے بھائیوں، اپنے عزیز و اقارب اور اپنے چاہنے والوں کو چھوڑا ہے، جن کے لیے ان کی کمی کبھی پوری نہیں ہو سکتی۔

نوجوانوں کے لیے ان کی زندگی ایک پیغام ہے۔ اصل کامیابی یہ نہیں کہ انسان کتنا کما لے، اصل کامیابی یہ ہے کہ وہ اپنے ملک کے لیے کتنا دے جائے۔ میجر عمر ناصر منہاس نے سب کچھ دے دیا۔ چتال کا بیٹا آج کولپور کا شہید بن کر امر ہو گیا۔ اللہ تعالیٰ انہیں جنت الفردوس میں اعلیٰ مقام عطا فرمائے اور ان کی فیملی کو صبرِ جمیل عطا فرمائے۔ آمین۔

جواب چھوڑیں

آپ کا ای میل ایڈریس شائع نہیں کیا جائے گا.