فکری بصیرت، توازن اور حزم، زندگی کے نو بنیادی اصول اور فلسفیانہ افکار۔

0

احمدخان اچکزئی

 

محترم قارئین، انسانی زندگی محض روزمرہ کے معمولات، مادی تگ و دو اور حادثاتی طور پر پیش آنے والے واقعات کا مجموعہ نہیں ہے، بلکہ یہ فکری، اخلاقی، روحانی اور سیاسی اقدار کا ایک ایسا مربوط سلسلہ ہے جو انسان کے باطن سے لے کر ریاست کے ایوانوں تک اثر انداز ہوتا ہے۔ جب ہم کائنات کے نظام، انسانی نفسیات، طبّی حقائق، سیاسی شعور اور سماجی رویوں کا گہرائی سے جائزہ لیتے ہیں، تو چند ایسے اصول سامنے آتے ہیں جو انسان کی انفرادی اور اجتماعی زندگی کی کامیابی کی بنیاد بنتے ہیں۔ درج ذیل نو نکات اسی جامع فکری فلسفے کا نچوڑ ہیں، جو زندگی کے مختلف شعبوں میں حقیقی راہنمائی فراہم کرتے ہیں۔مادی دنیا میں انسان کی سب سے بڑی تگ و دو قیمتی وسائل اور منرلز کے حصول کے لیے ہوتی ہے۔ زمین کے سینے سے نکلنے والا سونا، چاندی، تیل اور معدنیات ریاستوں کی معیشت کو مضبوط کرتی ہیں، لیکن یہ مادی فراوانی اس وقت تک بے معنی رہتی ہے جب تک انسان کے اندرونی نظام میں سکون اور امن موجود نہ ہو۔ اصل دولت دلی سکون اور ذہنی توازن ہے۔ اگر زمین تمام تر معدنی دولت سے مالامال ہو لیکن انسان کا دماغ انتشار، خوف، حرص اور اضطراب کا شکار ہو، تو وہ سوسائٹی کبھی خوشحال نہیں ہو سکتی۔ امن زمین کی گہرائیوں میں نہیں، بلکہ انسان کے اپنے مائنڈ کی تربیت، اخلاقی پاکیزگی اور اعتدال پسندی میں پوشیدہ ہے۔زندگی نشیب و فراز کا نام ہے؛ یہاں آزمائشیں، مشکلات، بحران اور ناکامیاں آتی رہتی ہیں۔ جو لوگ معمولی مشکلات پر گھبرا جاتے ہیں، وہ اندر سے ٹوٹ جاتے ہیں۔ حالات کیسے ہی کیوں نہ ہوں، اصل بات انسان کی قلبی مضبوطی ہے۔ جب انسان یہ تہیہ کر لیتا ہے کہ حالات کتنے ہی ناسازگار کیوں نہ ہوں، وہ اپنے سکون اور قوتِ ارادی کو شکست نہیں ہونے دے گا، تو بڑے سے بڑا طوفان بھی اس کا کچھ نہیں بگاڑ سکتا۔ یہ نظریہ حوصلے، صبر اور بحران پر قابو پانے کی بہترین صلاحیت کا عکاس ہے۔ انسانی نفسیات کا ایک کمزور پہلو یہ ہے کہ وہ نعمت کے حصول سے پہلے اس کی قدر کرتا ہے، لیکن مل جانے کے بعد لاپرواہی کا شکار ہو جاتا ہے۔ صحت، مال، اولاد، اقتدار، علم اور امن یہ سب اللہ تعالیٰ کی عظیم نعمتیں ہیں۔ جب انسان کو یہ نعمتیں میسر آ جاتی ہیں، تو وہ اکثر غفلت میں مبتلا ہو جاتا ہے، جس سے زوال کا سفر شروع ہوتا ہے۔ نعمت ملنے کے بعد ذمہ داری بڑھ جاتی ہے۔ اس کی حفاظت، اس کا شکر اور اس کا درست استعمال ہی اس کے دوام کی ضمانت ہے۔ لاپرواہی اور ناشکری بڑی سے بڑی خوشحالی کو لمحوں میں تباہ کر دیتی ہے۔موجودہ دور کے المیے میں انسانیت کی خدمت اور شفا خانے صنعت اور تجارت میں بدل چکے ہیں۔ طب جو کہ ایک مقدس پیشہ اور خدمتِ خلق کا ذریعہ تھی، آج بعض جگہوں پر منافع کمانے کا ذریعہ بن چکی ہے۔ مریض کو شفا دینے کے بجائے اسے مستقل گاہک بنانے کی جو سوچ پروان چڑھ رہی ہے، وہ اخلاقی زوال کی انتہا ہے۔ یہ حقیقت ہمیں جھنجھوڑتی ہے کہ ہم اپنے طبی اور سماجی نظام کا محاسبہ کریں اور یہ دیکھیں کہ کیا ہم نے انسانی زندگی اور درد کو بھی کاروبار کی نذر کر دیا ہے یا نہیں۔ اس کے برعکس، طبّی تاریخ اور انسان کی عملی زندگی کا یہ ایک اٹل سچ ہے کہ ڈاکٹر، ہسپتال اور ادویات محض ظاہری اسباب اور وسائل ہیں؛ اصل شفا دینے والی ذات صرف اور صرف خالقِ کائنات کی ہے۔ جب انسان دوا کو ہی سب کچھ سمجھ لیتا ہے اور اسباب پر بھروسہ کرنے لگتا ہے، تو وہ توکل کی روح سے محروم ہو جاتا ہے۔ دوا کا استعمال حکمت کا تقاضا ہے، لیکن دل کا یقین ہمیشہ اللہ کی ذات پر ہونا چاہیے۔ یہ عقیدہ انسان کو تکبر سے بچاتا ہے اور بیماری کی حالت میں بندگی کا درس دیتا ہے۔سیاسی فلسفے اور حکمرانی کے اصولوں میں تنقید کی آزادی اور احتساب کا نظام ریڑھ کی ہڈی کی حیثیت رکھتا ہے۔ جب کسی حکمران یا اقتدار پر تنقید کا دروازہ بند کر دیا جاتا ہے، تو خوشامدی عناصر اس کے اردگرد حصار بنا لیتے ہیں، جس سے وہ زمینی حقائق سے کٹ جاتا ہے۔ تنقید وہ آئینہ ہے جو اقتدار کے خدوخال کی اصل حقیقت دکھاتا ہے۔ اگر بروقت اصلاح نہ کی جائے، تو مطلق العنانی ریاست کو اندر سے کھوکھلا کر دیتی ہے اور آخر کار پوری سلطنت تباہی کے دہانے پر پہنچ جاتی ہے۔ اسی طرح انسانی تعلقات میں بحث مباحثہ جیتنا کوئی کمال نہیں ہے۔ اکثر جب ہم بحث میں جیتنے کی کوشش کرتے ہیں، تو الفاظ کی تلخی سے سامنے والے کا دل ہار جاتے ہیں۔ عقلمندی کا تقاضا یہ ہے کہ گفتگو کا مقصد انا کی تسکین یا فریقِ مقابل کو نیچا دکھانا نہ ہو، بلکہ باہمی افہم و تفہیم اور محبت سے دلوں کو فتح کرنا ہو جغرافیائی اور سیاسی لحاظ سے کسی خطے کی اہمیت اس کے اردگرد کے پورے نظام کو متاثر کرتی ہے۔ بلوچستان جیسے حساس اور وسیع خطے کی سلامتی اور خوشحالی پورے ملک کے ساتھ جڑی ہوئی ہے۔ اگر خطے کا کوئی بنیادی ستون کمزور ہو یا گر جائے، تو اس کے منفی اثرات پوری ریاست پر زنجیر کی طرح پھیل جاتے ہیں۔ قومی یکجہتی اور تمام اکائیوں کے حقوق کا تحفظ ہی اس لہر کو روکنے کا واحد راستہ ہے۔ آخر کار، انسان دشمن کے مارنے سے نہیں بلکہ اپنی سوچ کی کمزوری سے مرتا ہے۔ اصل شکست ظاہری دشمن کی تلوار سے نہیں ہوتی، بلکہ انسان کے اپنے اندر کی فکری کمزوری، مایوسی اور پست ہمتی سے ہوتی ہے۔ جب انسان کی سوچ کمزور ہو جاتی ہے، وہ خود اعتمادی کھو بیٹھتا ہے اور حالات کے سامنے ہتھیار ڈال دیتا ہے، تو فتح کا آغاز ہمیشہ ایک مضبوط سوچ، بلند حوصلے اور غیر متزلزل عزم سے ہوتا ہے۔

جواب چھوڑیں

آپ کا ای میل ایڈریس شائع نہیں کیا جائے گا.