تحریر: عباس مہد
صدیوں کا سفر جب تھک ہار کر تاریخ کے کسی گمشدہ اور تاریک موڑ پر رک جاتا ہے، جب معاشرے کے ایوانوں میں فکری مرغوبیت اور غلامی کی گھپ اندھیری رات اپنے پر پھیلاتی ہے، اور جب انسان اپنی ہی ذات کے خول میں گھٹ گھٹ کر دم توڑنے لگتا ہے، تو دھرتی کی کوکھ سے کوئی ایسا فرزندِ ارجمند جنم لیتا ہے جو وقت کی نبض پر ہاتھ رکھ کر کائنات کا مقدر بدل دیتا ہے۔ نو سو برس کی طویل اور تھکا دینے والی خاموشی کے بعد، جب تاریخ کے سینے پر ایک بار پھر عزمِ صمیم اور خودی کا قحط پڑا، تو قدرت نے سیالکوٹ کی مٹی پر اپنی رحمت کی ایسی نظر ڈالی کہ نو نومبر کے طلوعِ سحر کے ساتھ ایک ایسا چراغ جل گیا جس کی ضیا پاشیوں نے مشرق و مغرب کے تمام افق کو منور کر دیا۔ وہ چراغ، وہ پیکرِ فکر، وہ مردِ قلندر اور حکیم الامت محمد اقبال تھا!آئیے، نو نومبر کے اس مبارک دن کی مناسبت سے اس داستانِ حیات کے دریچوں سے جھانک کر دیکھتے ہیں کہ وہ کون سا گھرانہ تھا، کیسی مٹی تھی، اور وہ کون سی مقدس آغوش تھی جہاں سے یہ آفتابِ عالم تاب طلوع ہوا اور اس نے سیالکوٹ کے مکتب سے لے کر یورپ کے فکری ایوانوں تک کیسا محیر العقول سفر طے کیا۔سیالکوٹ کی اس پرانی اور گنجان گلی میں، جہاں پتھروں پر ٹانکیاں مارتے ہوئے ہاتھوں کی آوازیں گونجتی تھیں، ایک ایسا گھر آباد تھا جس کے در و دیوار پر زہد اور تقویٰ کا نکھار تھا۔ شیخ نور محمد—ایک ایسا درویش صفت انسان جس کی پیشانی پر سجدوں کے نور کا حصار تھا اور جن کے ہاتھوں میں رزقِ حلال کی پاکیزگی رچی بسی تھی۔ وہ کوئی تخت نشین نواب یا زرخیز زمینوں کے مالک نہیں تھے، بلکہ وہ مٹی کے ظروف بنا کر اپنے بچوں کا پیٹ پالنے والے ایک باطن کے سلطان تھے، جن کے گھر کا ایک ایک نوالہ دعاؤں کی خوشبو میں بسایا ہوا تھا۔ اور اس مردِ درویش کی آغوشِ تلطف میں جب امام بی بی جیسی پارسا، تہجد گزار اور سراپا دعا ماں کی تربیت کا سایہ پڑا، تو اس مقدس کوکھ سے اس عہد کے سب سے بڑے مفکر نے جنم لیا۔نو نومبر کا سورج جب سیالکوٹ کے افق پر چمکا، تو اس معصوم بچے کی پہلی کچی ہنسی میں آنے والے زمانوں کا وہ طوفان چھپا تھا جس نے فرنگیوں کے ایوانوں کو ہلا کر رکھ دینا تھا۔ ان کی ابتدائی تعلیم کا آغاز سیالکوٹ کے مکتب سے ہوا، جہاں مولوی میر حسن جیسے یگانہ روزگار استاد کی شفقت اور صحبت نے ان کے اندر کے جوہر کو تراشا۔ مولوی میر حسن نے اقبال کو صرف عربی اور فارسی کی گرامر نہیں پڑھائی، بلکہ ان کی روح میں قرآن کا فہم، تصوف کی لطافت اور کلاسیکی ادب کی خوشبو اتار دی۔ یہیں سے اقبال کے فکری سفر کا وہ پہلا زینہ طے ہوا جس نے انہیں دنیا کے عام طالب علموں سے ممتاز کر دیا۔اس کے بعد اقبال کا کارواں لاہور کی طرف بڑھا۔ گورنمنٹ کالج لاہور کے علمی اور فلسفیانہ ماحول میں پروفیسر آرنلڈ جیسے بلند پایہ استاد کی زیرِ سرپرستی اقبال کی فکری پرواز کو نئے پر مل گئے۔ یہاں انہوں نے فلسفے میں ماسٹرز کیا اور انسانی نفسیات، تاریخ اور تہذیبوں کے عروج و زوال کا گہرا مطالعہ کیا۔ لاہور کے اس دور میں ان کی شاعری نے ابتدائی ارتقا کی منزلیں طے کیں، جہاں انہوں نے “نالہِ یتیم” اور “ہمالہ” جیسی لازوال تخلیقات کے ذریعے اپنی شاعری کا لوہا منوایا۔ وہ انجمن حمایتِ اسلام کے جلسوں میں جب اپنی ترنم ریز آواز میں نظمیں سناتے، تو مجمع پر ایک وجد طاری ہو جاتا تھا۔لیکن اقبال کی پیاس یہاں نہیں بجھی۔ 1905ء میں وہ اعلیٰ تعلیم کے لیے سمندر پار کر کے یورپ روانہ ہوئے—یہ ان کی زندگی کا وہ موڑ تھا جس نے ان کے فکر کو آفاقی وسعت عطا کی۔ انہوں نے کیمبرج یونیورسٹی سے فلسفے کی ڈگری لی، لنکنز ان سے بار اٹ لا کی سند حاصل کی، اور جرمنی کی میونخ یونیورسٹی سے “فارس میں ما بعد الطبیعیات کا ارتقا” پر پی ایچ ڈی کی ڈگری مکمل کی۔ یورپ کے اس قیام کے دوران انہوں نے مغربی تہذیب کو اندر سے دیکھا۔ انہوں نے دیکھا کہ مادی ترقی کی اس اندھی دوڑ میں یورپ کی روح مر چکی ہے اور وہ انسان کو مشین کا پرزہ بنا چکے ہیں۔ اس مشاہدے نے اقبال کو مغربی جمود اور کورانہ تقلید کا شدید منتقد بنا دیا، اور یہیں سے ان کے اندر وہ زبردست فکری انقلاب برپا ہوا جس نے انہیں مشرق کا ترجمان بنا دیا۔یورپ سے واپسی کے بعد اقبال نے وکالت کے ساتھ ساتھ اپنے قلم کو اس قوم کے بیدار کرنے کے لیے وقف کر دیا۔ انہوں نے شاعری کو تفریح کا ذریعہ نہیں بنایا، بلکہ اسے تلوار کی طرح استعمال کیا۔ “شکوہ اور جوابِ شکوہ” کے ذریعے انہوں نے خدا کی عدالت میں امت کا مقدمہ لڑا، اور “اسرارِ خودی” اور “رموزِ بیخودی” کے ذریعے امت کو یہ درس دیا کہ جب تک انسان اپنی خودی کو بیدار نہیں کرتا، وہ غلامی کی زنجیروں سے نجات نہیں پا سکتا۔ ان کا شاہین محض ایک پرندہ نہیں ہے، بلکہ وہ اس بلند حوصلہ نوجوان کا استعارہ ہے جو طوفانوں کے سینے پر پاؤں رکھ کر پرواز کرتا ہے اور جو زمین کی آلائشوں سے آزاد ہو کر صرف آسمانوں کی وسعتوں کو ناپتا ہے۔اور پھر وہ تاریخی لمحہ بھی آیا جب 1930ء کے خطبہ الٰہ آباد میں انہوں نے برصغیر کے مسلمانوں کے لیے ایک الگ اور آزاد وطن کا فکری خاکہ پیش کیا۔ وہ محض ایک سیاسی نعرہ نہیں تھا، بلکہ وہ صدیوں کے تاریخی پس منظر، تہذیبی تشخص اور اسلام کے عادلانہ نظام کی عملی تعبیر کا خواب تھا۔ انہوں نے بتا دیا کہ مسلمان اس خطے میں ایک الگ امت ہیں جن کا سیاسی اور تہذیبی مستقبل اپنی مرضی کے مطابق طے ہونا چاہیے۔آج جب ہم نو نومبر کے اس باب کو الٹتے ہیں اور یومِ اقبال پر اپنے گریبان میں جھانکتے ہیں، تو دل لہو کے آنسو روتا ہے کہ ہم نے اس عظیم ترین فکری سرمائے کو محض نصابی کتابوں اور رٹی ہوئی تقریروں تک قید کر کے رکھ دیا ہے۔ اگر آج ہمیں اس پستی، زوال اور فکری اندھیرے سے نکلنا ہے، تو ہمیں پھر سے اقبال کے در پر حاضری دینا ہوگی، اپنی گری ہوئی خودی کو اٹھانا ہوگا، اور اپنی آنے والی نسلوں کو شاہین کی طرح جینا سکھانا ہوگا۔آمین ثم آمین!
